Vörukarfa Alþýðusambands Íslands (ASÍ) hækkaði í átta af átta matvöruverslunum sem könnunin nær til á rúmlega sjö mánaða tímabili. Vörukarfan hækkaði á bilinu 5-17%, mest hjá Heimkaupum, 16,6% en minnst í Krónunni eða um 5,1%.
„Þetta er í takt við breytingar á vísitölu neysluverðs á sama tímabili sem sýnir 6,2% hækkun á á mat- og drykkjarvöru. Næst mest hækkaði vörukarfan hjá Iceland, 12,4% og næst minnst hjá Bónus, 5,7%. Vörukarfa ASÍ endurspeglar almenn matarinnkaup meðalheimilis,“ segir í tilkynningu frá ASÍ um málið.
Þar er þess getið að í tilkynningunni séu einungis birtar upplýsingar um verðbreytingar milli verðmælinga. Því er ekki um beinan verðsamanburð að ræða þ.e.a.s. hvar ódýrustu vörukörfuna var að finna.
Eins og áður segir hækkaði karfan mest hjá Heimkaupum. Drykkjarvörur er sá matvöruflokkur sem hækkaði mest hjá Heimkaupum, 33,8% en kjötvara minnst, 6,7%.
Næst mest hækkaði vörukarfan í Iceland, 12,4%. Mest hækkaði mjólkurvara hjá Iceland, 24,1% og er það mesta hækkun í þessum vöruflokki í könnuninni. Ef litið er til annarra verslana sem eru með meira vöruúrval, lengri opnunartíma eða eru staðsettar úti á landi má sjá að vörukarfan hækkar um 8,9% í Krambúðinni, um 7,5% í Kjörbúðinni og um 6,5% í Hagkaup.
„Þegar litið er til lágvöruverðsverslana má sjá að vörukarfan hækkaði mest í Nettó, 8,7% en minnst í Krónunni, 5,1%. Í Nettó voru mestar verðhækkanir í flokki kjötvara, mjólkurvara, osta og eggja, 11% í báðum flokkum. Minnst hækkaði verð á drykkjarvöru í Nettó, 1,6%. Í Krónunni hækkaði kjötvara mest í verði, 10% og mjólkurvara, ostar og egg næst mest, 8%. Verð á grænmeti lækkaði hins vegar um 1,3% og verð ávöxtum um 0,8%. Verð í öðrum matvöruflokkum í versluninni hækkaði um 3-5%. Í Bónus hækkaði vörukarfan um 5,7% Í Bónus varð mest hækkun á ávöxtum á tímabilinu, 10,3%. Þar á eftir kemur 8,9% hækkun á hreinlætis- og snyrtivöru og 8,3% hækkun á mjólkurvöru, ostum og eggjum eins og sjá má í töflunni hér að neðan,“ segir í tilkynningunni.
„Miklar verðhækkanir voru í öllum vöruflokkum en mest hækkaði verð í flokki mjólkurvara, osta og eggja eða á bilinu 8-25%. Bæði hækkaði verð í flokknum að meðaltali mest, um 14,2% auk þess sem miklar verðhækkanir í vöruflokknum náðu til allra verslana. Verð á kjötvöru, ávöxtum og grænmeti hækkaði einnig mikið en hafa ber í huga að ávextir, grænmeti og kjötvara eru matvöruflokkar þar sem verð sveiflast mest. Minni hækkanir voru á hreinlætisvöru, sykur, súkkulaði og sælgæti og flokki ýmissa matvara sem samanstendur af fisk, olíum og feitmeti og þurrvörum og dósamat. Verð í þeim flokkum hækkaði að meðaltali á bilinu 6-7%.“