Ríkisendurskoðandi gefur ekki upp launakostnað eða ráðningarkjör Jóns Þórs Sturlusonar, deildarforseta viðskiptadeildar HR og fv. aðstoðarforstjóra Fjármálaeftirlitsins, við gerð stjórnsýsluúttektar stofnunarinnar vegna sölu ríkisins á 22,5% hlut sínum í Íslandsbanka, sem skilað var í síðustu viku. ViðskiptaMogginn spurði hvernig ráðning Jóns Þórs hefði komið til, í hverju vinna hans hefði falist og hver kostnaðurinn væri við ráðninguna.
Guðmundur Björgvin Helgason ríkisendurskoðandi segir í svari sínu að ákvæði upplýsingalaga taki ekki til Ríkisendurskoðunar. Þá fengust ekki upplýsingar um það hvort vinnu Jóns Þórs fyrir embættið væri lokið eða hvort hann væri enn að störfum né heldur kostnaður embættisins við gerð úttektarinnar.