Vátryggingafélag Íslands (VÍS) og hluthafar Fossa fjárfestingarbanka (Fossar) hafa undirritað kaupsamning um kaup VÍS á öllu hlutafé í Fossum. Kaupin eru gerð á grundvelli viljayfirlýsingar um sameiningu félaganna, að því er fram kemur í tilkynningu frá VÍS.
Þar segir að kaupin séu háð skilyrðum svo sem samþykki eftirlitsstofnana og samþykki hluthafafundar VÍS.
„Horft er til þess að áhrif af sameiningu felist fyrst og fremst í tækifærum til vaxtar og sóknar frekar en kostnaðarhagræðingu,“ segir í tilkynningu.
Að lokinni sameiningu verður Haraldur Þórðarson ráðinn forstjóri VÍS samhliða Guðnýju Helgu Herbertsdóttur.
Haraldur mun stýra rekstri samstæðunnar, fjármögnun og þróun fjármálastarfsemi en Guðný Helga tryggingarekstrinum.