Kaupa tvö upplýsingatæknifyrirtæki og sameina

Framtakssjóðurinn Leitar I og Leitarsjóðurinn Seek ehf., sem er í eigu Hlöðvers Þórs Árnasonar, hafa fest kaup á tveimur íslenskum upplýsingatæknifyrirtækjum með það fyrir augum að sameina fyrirtækin til að byggja upp upplýsingatækniþjónustu á breiðari grunni.

Um er að ræða fyrirtækin Andes ehf. og Prógramm ehf. Andes var stofnað árið 2019 og sérhæfir sig í skýjaþjónustu og er viðurkenndur samstarfsaðili AWS. Starfsmenn þess eru 17 í dag, en auk þess að aðstoða fyrirtæki og stofnanir við að setja upp upplýsingatæknirekstur í skýinu, þá leggur fyrirtækið áherslu á sjálfvirknivæðingu á hugbúnaðarþróunarferlum. Hefur fyrirtækið meðal annars komið að því að reka og þróa innviði stafræns Íslands.

Prógramm var stofnað árið 2007, en þar starfa 35 manns. Fyrirtækið sérhæfir sig í flóknum hugbúnaði fyrir stofnanir og fyrirtæki.

Í tilkynningunni kemur fram að seljendur séu stofnendur og lykilstarfsmenn fyrirtækjanna, en meirihluti þeirra mun áfram starfa með nýjum eigendum. Mun Hlöðver Þór, eigandi Seek, taka við framkvæmdastjórn þeirra beggja.

Leitar I er framtakssjóður í stýringu Leitar Capital Partners ehf. sem er rekstraraðili sérhæfðra sjóða. Leitar Capital Partners var stofnað á síðasta ári af Birgi Erni Birgissyni, Einari Þór Steindórssyni og Íslenskri fjárfestingu, fjárfestingarfélagi Arnars Þórissonar og Þóris Kjartanssonar. Félagið lauk fjármögnun Leitar I undir lok síðasta árs en að Leitar I koma 17 einkafjárfestar auk Arion banka og VÍS.

Hlöðver Þór Árnason hóf leit í mars á þessu ári þegar hann stofnaði leitarsjóðinn Seek í samstarfi við Leitar Capital Partners sem fjármagnaði og studdi leit Hlöðvers. Hlöðver starfaði áður sem forstöðumaður upplýsingatækni hjá Kviku banka. Hlöðver hefur tekið virkan þátt í nýsköpun og er einn stofnenda Parka og var áður tæknistjóri hjá Já hf.

• Blogga um frétt