Viðskipti | mbl | 1.12.2023 | 15:23

Fólk hugi betur að veskinu við jólainnkaupin í ár

Íslendingar hyggjast eyða minna í jólagjafir í ár en í fyrra mbl.is/Golli

Rannsóknasetur verslunarinnar (RSV) spáir 0,29% samdrætti í smásöluverslun um jólin á föstu verðlagi. RSV spáir að jólaverslun í smásölu verði 135,9 milljarðar króna en spáin nær yfir bæði nóvember og desember mánuð.

Jólaverslunin árið 2022 var 126,1 milljarður króna. Þetta segir í tilkynningu frá RSV, sem segir það nokkuð ljóst að landsmenn séu fyrr á ferðinni í ár heldur en oft áður vegna tilboðsdaga á borð við Dag einhleypra, Svartan föstudag og Stafrænan mánudag.

Aftur á móti gefi hækkandi stýrivextir, 8% verðbólga og hækkun matarkörfunnar í skyn að landsmenn hugi betur að veskinu í ár. Þá hefur færst í aukana að fólk sé að klára jólainnkaupin fyrr en áður, segir í tilkynningunni.

Einkaneysla hækkað um 12,9%

Einkaneysla hefur hækkað um 12,9% að meðaltali á árinu. Það má rekja til hækkun vöruverðs en innlend velta í dagvöruverslun hefur hækkað um 17,7% á árinu. Þá hefur verið aukning í smásöluverslun samkvæmt virðisaukaskattskýrslum um 10,1% á árinu.

Þróun Kortaveltu RSV á árinu hefur sýnt að árið fór mun betur af stað en árið á undan en það hægðist svo á neyslunni þegar líða fór á haustið. Væntingavísitala Gallup hefur að meðaltali lækkað um 11,6% á árinu en væntingavísitalan metur stöðu efnahagsástandsins og atvinnuástandsins hverju sinni.

Íslendingar hyggjast eyða 12.000 kr. minna í jólagjafir í ár en í fyrra

RSV gerði könnun í samstarfi við Prósent um hvað Íslendingar hyggjast eyða miklu í jólagjafir í ár. Íslendingar ætla að eyða um 99.000 kr. í jólagjafir í ár í samanburði við 111.000 kr. í fyrra. Það er 11,3% lækkun á milli ára.

Þá er lækkunin hlutfallslega mest hjá fólki 65 ára og eldri en konur eru líklegri til að eyða meiru í jólagjafir en karlar í ár. Gögnunum var safnað frá 9. til 20. nóvember 2023 og var úrtakið 1.800 manns en svarhlutfallið 52%.

Jólaspá RSV horfir til þróun kaupmáttar launa og vísitölu neysluverðs, þróun kortaveltu, þróun einkaneyslu, þróun smásöluverslunar samkvæmt virðisaukaskattsskýrslum, vísitölu RSV um smásöluverslun og væntingavísitölu Gallup.