Seðlabankinn hefur lagt mat á áhrif frumvarps fjármálaráðherra um úrvinnslu og uppgjör ÍL-sjóðs, en sú umsögn hefur þó ekki enn verið gerð opinber, en það stendur til. Ljóst er að það að koma 600-700 milljarða eignum, sem teljast illseljanlegar, getur haft töluverð áhrif á fjármálamarkað og fjármálastöðugleika hér á landi.
Þetta var meðal þess sem kom fram í máli Ásgeirs Jónssonar seðlabankastjóra og Gunnar Jakobsson, varaseðlabankastjóri fjármálastöðugleika, á kynningarfundi eftir yfirlýsingu fjármálastöðugleikanefndar í morgun.
„Það er alveg ljóst að það að ætla að vinda þessa stofnun niður, það er að ætla að gera hana upp, það hefur náttúrulega töluverð áhrif á fjármálamarkaði. Bara það að eignir sjóðsins séu óseljanlegar og það ef á að koma þeim í verð og greiða þær út, þá hefur það töluverð áhrif á markaði og ekki sama hvernig það er gert,“ sagði Ásgeir á fundinum og vísaði til þess að um 600-700 milljarða illseljanlegar eignir væri að ræða.
Gunnar ítrekaði að bankinn hefði lagt mat á áhrif af frumvarpinu á fjármálastöðugleika, þó það hafi ekki enn verið opinberað. Hann tók hins vegar undir áhyggjur Ásgeirs. „Að koma því í verð á grunnum íslenskum fjármálamarkaði er ekki auðvelt verk og ef ætti að gera það með hraði hefði það klárlega áhrif á fjármálastöðugleika.“
Bætti Gunnar því við að Seðlabankinn hefði samt ekki skoðun á því hvort farin yrði sú leið sem fjármálaráðherra hefur lagt til eða önnur, það væri umfjöllunarefni stjórnmála. Hins vegar verði að huga vel að því hvernig uppgjörið fari fram.