Fólk í Garðabæ ber ekki hækkunina eitt

„Það er tillaga sem liggur til seinni umræðu í fjárhagsáætlun sem verður afgreidd á fimmtudaginn nk. Hún felur það í sér að álagningarhlutfall fasteignagjalda fyrir íbúðarhúsnæði lækkar úr 0,166% í 0,163% á næsta ári. Einnig lækka vatns- og holræsagjöld. Álögur á atvinnuhúsnæði haldast hins vegar óbreyttar, 1,52%, á næsta ári,“ segir Almar Guðmundsson, bæjarstjóri Garðabæjar, í samtali við ViðskiptaMoggann.

Eins og fjallað var um í síðustu viku hafa Kópavogur og Hafnarfjörður lækkað fasteignagjöld sín fyrir næsta ár til að koma til móts við hækkandi íbúðaverð og þar með hærri álögur.