Seðlabanki Íslands segir fjármálakerfið traust

Fjármálaskilyrði hafa versnað samhliða því sem hægt hefur á efnahagsumsvifum en skuldahlutfall bæði heimila og fyrirtækja er hóflegt, hvort heldur miðað er við tekjur eða eiginfjárstöðu. 

Þetta kemur fram í yfirlýsingu fjármálastöðugleikanefndar Seðlabanka Íslands. Segir í yfirlýsingunni að þau skilyrði skapi svigrúm til að aðlaga greiðslubyrði húsnæðislána að greiðslugetu og þeim lánþegaskilyrðum sem nefndin hefur sett.

Yfirlýsingin var birt klukkan 8.30 í morgun en seðlabankastjóri mun gera grein fyrir yfirlýsingunni á blaðamannafundi klukkan 9.30. 

Frétt af mbl.is

Beint: Fjármálastöðugleikanefnd fer yfir málin

Sveiflujöfnunarauki að óbreyttu í 2,5%.

Engu að síður segir nefndin fjármálakerfið hér á landi traust og að eiginfjár- og lausafjárstaða kerfislega mikilvægra banka sé sterk. 

Þó dregið hafi úr vexti útlána sé geta þeirra góð til áframhaldandi miðlunar lánsfjár til heimila og fyrirtækja. Erlend markaðsfjármögnun bankanna sé í góðum farvegi og á áætlun.

„Vanskil eru lítil og hafa aukist óverulega þrátt fyrir aukna verðbólgu, hækkun vaxta og þyngri greiðslubyrði. Í ljósi þessa ákvað nefndin að halda gildi sveiflujöfnunaraukans óbreyttu í 2,5%.“

Styðja frumvarp um aukið rekstraröryggi

Segir nefndin lífeyrissjóði ráðandi þátttakendur á innlendum fjármálamarkaði og leggur því áherslu á að lagaleg umgjörð um sjóðina og þær kröfur sem gerðar eru til þeirra við miðlun fjármagns séu samanburðarhæfar við þær sem gerðar eru til annarra aðila á fjármálamarkaði.

Kemur einnig fram að nefndin styðji framgang frumvarps um aukið rekstraröryggi í greiðslumiðlun sem lagt hefur verið fram í samráðsgátt stjórnvalda.

„Mikilvægt er að huga heildstætt að viðnámsþrótti greiðslumiðlunar, koma sem fyrst á óháðri innlendri greiðslumiðlun, styrkja net- og rekstraröryggi fjármálafyrirtækja og treysta rekstrarsamfellu.“

Staðfesta mikilvægi þriggja banka

Fjármálastöðugleikanefnd hefur lokið árlegu endurmati á kerfislega mikilvægum fjármálafyrirtækjum og eiginfjárauka vegna kerfislegs mikilvægis.

Staðfestir nefndin kerfislegt mikilvægi þriggja banka: Arion banka, Íslandsbanka og Landsbankans, og hefur ákveðið að halda eiginfjárauka vegna kerfislegs mikilvægis óbreyttum í 2% á allar áhættuskuldbindingar.

„Fjármálastöðugleikanefnd mun áfram beita þeim stýritækjum sem hún hefur yfir að ráða til að varðveita fjármálastöðugleika hér á landi svo að fjármálakerfið geti staðist áföll, miðlað lánsfé og greiðslum og dreift áhættu með viðhlítandi hætti.“

• Blogga um frétt