Viðskipti | mbl | 12.2.2024 | 18:33

Skatturinn afnemur bónuskerfi starfsmanna

Skatturinn hefur greitt starfsmönnum sínum bónusa á liðnum árum, þar á meðal starfsmönnum sem sinna skattarannsóknum. mbl.is/Kristinn Magnússon

Skatturinn hefur ákveðið að leggja af bónuskerfi til starfsmanna stofnunarinnar, kerfi sem kallað er viðbótarlaunakerfi. Þetta kemur fram í tilkynningu á vefsíðu Skattsins.

Nokkuð hefur verið fjallað um bónuskerfi Skattsins að undanförnu. Morgunblaðið greindi frá því um miðjan janúar að starfsmönnum Skattsins stæði til boða sérstök viðbótarlaun eða bónusgreiðslur tvisvar á ári ef þeir skila sérstöku eða framúrskarandi vinnuframlagi í þágu embættisins. Þá greindi blaðið jafnframt frá því að um 260 milljónir króna hefðu verið greiddar í sérstaka bónusa til starfsmanna á liðnum fjórum árum.

Frétt af mbl.is

260 milljónir í bónusa á fjórum árum

Frétt af mbl.is

Geti leitt til ógildingar ákvarðana

„Verður ekki við það unað“

Í fyrrnefndri tilkynningu kemur fram að Skatturinn hafi samið við aðildarfélög BHM um breytingu á kjarasamningi sem tekur gildi frá og með síðustu áramótum. Ekki er greint nánar frá innihaldi þess samnings.

Skatturinn segir í tilkynningu sinni að gagnrýni og umfjöllun um eðli og framkvæmd viðbótarlaunakerfis hjá stofnuninni hafi „miðað að því að draga úr trúverðugleika skattyfirvalda og varpa rýrð á störf þeirra,“ eins og það er orðað í tilkynningunni.

„...þó að Skatturinn og aðildarfélög í BHM telji umrætt viðbótarlaunakerfi vera nútímalegt og gott kerfi sem hafi reynst öllum samningsaðilum vel, þá verður ekki við það unað í ljósi þeirrar stefnu sem umræðan um það hefur tekið,“ segir einnig í tilkynningunni.

Þá greinir Skatturinn jafnframt frá því að viðbótarlaun séu ekki háð fjárhæðum í endurákvörðunum. Stofnunin hefur þó staðfest við Morgunblaðið að starfsmenn sem sinna skattarannsóknum hafi fengið fyrrnefnda bónusa greidda.