Jákvæð afkomuviðvörun hjá Síldarvinnslunni

Rekstrarhagnaður Síldarvinnslunnar verður um 121 milljón bandaríkjadala og þannig nokkuð hærri en gert hafði verið ráð fyrir. Þetta kemur fram í jákvæðri afkomuviðvörun sem félagið sendi frá sér til Kauphallarinnar í dag.

Í áætlun félagsins sem lögð var fram á fyrri hluta árs, var gert ráð fyrir að rekstrarhagnaður (EBITDA) samstæðu félagsins yrði á bilinu 107-117 milljónir dollarar á árinu 2023. Drög að uppgjöri fjórða ársfjórðungs 2023 liggur nú fyrir og samkvæmt því mun rekstrarhagnaður ársins nema um 121 milljón dala.

Jákvæðir þættir i rekstrinum sem skýra betri afkomu

Einnig segir í tilkynningunni að útgerð og vinnsla hafi almennt gengið vel á árinu en á síðustu mánuðum hafa komið inn jákvæðir þættir í reksturinn sem skýra betri afkomu. Má þar nefna að verð á fiskimjöli og lýsi er betra en áætlanir gerðu ráð fyrir. Atburðirnir sem hófust í Grindavík 10. nóvember hafa á móti neikvæð áhrif vegna framleiðslustöðvunar og einskiptiskostnaðar við björgun afurða. 

Það er tekið fram að vinna við ársuppgjör standi enn yfir og því geta lykiltölur tekið smávægilegum breytingum á uppgjörstímabilinu. Síldarvinnslan mun birta niðurstöður ársins 7. mars í samræmi við fjárhagsdagatal. 

• Blogga um frétt