Nike segir yfir 1.700 manns upp

Nike hefur ákveðið að segja upp um 2% starfsmanna sinna, eða hátt í 1.700 manns. Er þetta liður í að skera niður kostnað hjá fyrirtækinu, en það stefnir á allt að 270 milljarða króna niðurskurð á næstu þremur árum.

83.700 manns starfa hjá Nike.

„Aðgerðirnar sem við erum að grípa til setja okkur í þá stöðu að setja fyrirtækið rétta stærð til að grípa stærstu vaxtartækifærin,“ sagði talsmaður Nike í yfirlýsingu í gær.

„Þó að þessar breytingar muni hafa áhrif á um það bil 2% af starfsfólki okkar erum við þakklát fyrir framlagið frá öllum liðsfélögum Nike.“

CNN greinir frá.

Breytt neysluhegðun

Í desember dró Nike niður tekjuspá sína og tilkynnti að fyrirtækið myndi fara í niðurskurð vegna vaxandi áhyggna af því að neytendur um allan heim væru byrjaðir að hægja á neyslu.

Fyrirtækið sagði þá að það myndi leita leiða til að skera niður útgjöld um 270 milljarða króna næstu þrjú árin.

Í frétt CNN kemur fram að neytendur séu farnir að breyta neysluhegðun sinni með því að sleppa kaupum á vörum eins og dýrum strigaskóm og íþróttafatnaði til að eiga fyrir nauðsynjum og ódýrari afþreyingu.

• Blogga um frétt