66°Norður og Slysavarnarfélagið Landsbjörg hafa hannað húfu til fjáröflunar björgunarsveitanna.
Frá þessu er greint í tilkynningu.
Húfan heitir Landsbjargarhúfan og mun ágóðinn af sölu hennar renna til Slysavarnarfélagsins Landsbjargar.
Húfan er hönnuð af 66°Norður í samstarfi við Landsbjörg og er úr merino-ullarblöndu.
Markmiðið var að hanna sterka, hlýja og endingargóða húfu með þarfir björgunarsveitarfólks í huga. Hún er ekki síður hugsuð fyrir almenning, segir í tilkynningunni.
Innblástur fyrir mynstur Landsbjargarhúfunnar er hálendi Íslands og fjallagarðar landsins. Mynstrið er unnið út frá loftmynd af fjallaskaga á norðanverðu Íslandi.
Loftmyndin var tekin árið 1999, sama ár og Slysavarnarfélag Íslands og Landsbjörg sameinuðust og til varð Slysavarnarfélagið Landsbjörg.