Alvotech hefur gengið að tilboði frá hópi fagfjárfesta og viðurkenndra gagnaðila um sölu á 10.127.132 almennum hlutabréfum í félaginu að verðmæti um 22,8 milljarða króna.
Fram kemur í tilkynningu að tilboðsgjafar fái afhent áður útgefin hlutabréf, sem eru í eigu Alvotech, í gegnum dótturfélagið Alvotech Manco ehf. Viðskiptin verða í gegnum Kauphöllina, Nasdaq Iceland.
Endanlegt bindandi tilboð barst félaginu í morgun og hefur Alvotech ákveðið að ganga að því, að því er kemur fram í tilkynningu.
Fyrirtækið hyggst nýta féð í almennan rekstur, til að styrkja framleiðslugetu og við að koma væntanlegum líftæknilyfjahliðstæðum á markað.