Sér um herferð um frelsi kvenna til að aka bíl
Setja bókamerki
Íslenska nýsköpunarfyrirtækið Ghostlamp, sem tengir saman áhrifavalda á samfélagsmiðlum og fyrirtæki, hefur gert samning við auglýsingastofu Nissan í Mið-Austurlöndum um að vekja athygli á nýjum lögum sem taka gildi í júní á þessu ári í Saudi Arabíu og heimila þarlendum konum að aka bifreið.
,,Við erum auðvitað mjög spennt og þakklát fyrir að fá að taka þátt í að vekja athygli á svona sögulegum atburði eins og þessum,” segir Jón Bragi Gíslason, stofnandi og framkvæmdastjóri Ghostlamp.
,,Jafnvel þótt konur megi löglega keyra seinna á þessu ári þá er enn mikil íhaldssemi meðal fólksins á svæðinu, en það er einmitt þessi íhaldssemi sem verið er að reyna að breyta. Margar konur í Saudi Arabíu eru óöruggar þegar kemur að því að sækja um bílprófið, aðallega vegna þess að „þetta hefur alltaf verið svona“, en einnig vegna óvissu um hvernig aðrir fjölskyldumeðlimir muni bregðast við, skyldu þær byrja að keyra.
Bæði erum við að glíma við vanda kvenna að fá samþykki karlkyns fjölskyldumeðlima ásamt því að karlmenn þurfa að hafa áhyggjur af samþykki þjóðfélagsins um að verja „heiður“ fjölskyldunnar fyrir því að konur innan hennar keyri bíl. Verkefnið til lengri tíma er því að gera það þjóðfélagslega samþykkt að konur keyri bíla,” segir Jón Bragi.
Nissan hefur framleitt myndband þar sem nokkrar konur í Saudi Arabíu mæta í æfingaakstur, en það sem þær vita ekki er að ökukennarinn er fjölskyldumeðlimur sem þær héldu að væri mótfallinn því að þær fengju bílpróf.
Ghostlamp er nú að virkja kvenkyns áhrifavalda í Saudi Arabíu og biðja þær um að deila myndbandinu og segja sína skoðun, hvort þær ætli eða ætli ekki að sækja um bílprófið og af hverju.
Ghostlamp er íslenskt og hratt vaxandi fyrirtæki sem var stofnað árið 2014. Er það með yfir 22 milljónir áhrifavalda á skrá um allan heim og starfssemi í Reykjavík, New York, Los Angeles, Helsinki, Stokkhólmi, Amsterdam, Varsjá, London og Dubai.
Hægt að er fylgjast með ferðum Ghostlamp á Instagram og Snapchat: @teamghostlamp
