Borgarstjórnin í Minneapolis í Bandaríkjunum hefur bannað viðskipti um bíllúgur, svonefnda drive-throughs starfsemi. Flytjendur tillögu þar að lútandi sögðu að með afnámi þessara viðskiptahátta yrðu vegir öruggari og andrúmsloftið hreinna.
Rekstur af þessu tagi er þó ekki ýkja útbreiddur í Minneapolis, að sögn fréttavefsins Wedge Live. Það eru fyrst og fremst skyndibitastaðir og vínbúðir sem stundað hafa viðskipti um bíllúgur þar í borg.
Rannsóknir hafa sýnt, að svæði kringum skyndibitastaði eru sérdeilis hættuleg gangandi vegfarendum vegna fjölda að- og fráreina. Þykir algengt að ökumenn afvegaleiðist rétt áður en þeir panta sér mat við bíllúgur og á því augnabliki sem þeir aka á brott með snæðing sinn.
Í Flórída hefur rannsókn leitt í jós fjölgun ákeyrsla á gangandi vegfarendur í grennd við skyndibitastaði í hverfum tekjulítilla. McDonald’s, Wendy’s og Taco Bell tengdust allir aukinni slysahættu.
Þá segir í samþykkt Minneapolisborgar, að loftgæði myndu aukast í borginni vegna minni lausagangs bifreiða. Með því að binda endi á hann væri stuðlað að því að markmið borgarinnar um að draga úr losun gróðurhúsalofts um 80% fram til ársins 2050 næðust.