Fjör í Heklu

Fjöldi fólks lagði leið sína í bílaumboðið Heklu um helgina þar sem haustinu var fagnað og fimm nýir bílar frumsýndir.

„Það var sérstaklega skemmtilegt að sjá hver margir sáu sér fært að líta við hjá okkur á laugardaginn þegar við frumsýndum fimm nýja bíla. Stemningin var góð og greinilegt að það eru margir í bílahugleiðingum fyrir veturinn,“ segir Friðbert Friðbertsson forstjóri Heklu í tilkynningu.

Volkswagen kynnti nýjan Passat GTE sem er tengiltvinnbíll og hefur verið beðið síðan eldri útgáfan seldist upp fyrir nokkrum mánuðum. Helsta breytingin er að raforkudrægi hefur aukist um 30% og hentar hann núna enn betur þeim sem vilja aka á raforkunni eingöngu. Hann kemur nú með nýrri útgáfu af stýrikerfi þar sem meðal annars er hægt að ræsa bílinn með snjallsíma í stað hefðbundins lykils.

Nýr sportjeppi var í aðalhlutverki hjá Audi þegar Q5 TFSI e tengiltvinnbíllinn var kynntur. Hann dregur allt að 40 km. á rafmagninu einu. Hann er með fyrirferðalítið hleðslukerfi og hlaðinn tæknibúnaði sem veitir aukin þægindi og styður við sparneytinn akstur.

Mitsubishi kynnti 2020 árgerðina af tengiltvinnbílnum Outlander PHEV en í honum er nú  nýtt og endurbætt hljóðkerfi. Einnig tefldu þeir fram sportjeppanum ASX sem hefur fengið andlitslyftingu í takt við nýja línu Mitsubishi.

Þá nýtti Skoda tækifærið og frumsýndi metanbílinn Octavia G-Tec sem er kominn með nýju sniði. Stærsta breytingin á Octavia G-Tec er að nú kemur hann með tveimur metantönkum sem tryggir lengra drægi á innlendri orku.

Meðfylgjandi myndir voru teknar á sýningu Heklu.