Nokkrar sviptingar hafa orðið á lista yfir söluhæstu bíla Evrópu í ár miðað við í fyrra. Skýringanna er að hluta til að leita í kórónuveirufaraldrinum.
Volkswagen Golf heldur forystunni með 109.060 bíla selda fyrri helming ársins sem er 46,4% samdráttur frá sama tíma í fyrra. Renault Clio hinn franski klifraði upp í annað sætið með 95.071 seldan bíl, sem er 33,9% samdráttur.
Volkswagen Polo varð í þriðja sæti með 82.474 eintök og 45,4% samdrátt. Frá upphafi hafa 14 milljónir eintaka af Póló komið á götuna og er hann meðal allra vinsælustu smábíla sögunnar. Sjötta kynslóð hans sá dagsins ljós 2017.
Fjórð sæti á listanum skipar Volkswagen Tiguan með 77.983 eintök sem er 38.5% samdráttur frá í fyrra. Í næstu sætum urðu Skoda Octavia með 74.571 bíla (-35.4%) og Ford Focus í 71.058 eintökum (-38%).
Opel Corsa skaust upp um fjögur sæti og situr nú í því sjöunda með 66.216 bíla (-36.5%).
Áttunda sætið skipar Peugeot 208 með 66.201 bíla (-39.2%) og í níunda Nissan Qashqai sem fór í 65.764 eintökum (-37.5%) frá áramótum til júníloka.
Í tíunda sætinu er svo að finna Ford Fiesta – sem sat í sama sæti í fyrra – með 57.772 nýskráningar (-45.8%).
Segja má að stjarna ársins sé Volkswagen T-Cross sem selst hefur í 200,3% fleiri eintökum en 2019, eða 39.976. Er bíllinn í 29. sæti listans yfir söluhæstu bíla Evrópu frá áramótum.