Fyrsti rafdrifni lúxusjeppinn frá Mercedes-AMG
Setja bókamerki
Mercedes-Benz frumsýndi á dögunum nýjan lúxusjeppa sem gengur að fullu fyrir rafmagni. Þetta er jafnframt fyrsti AMG lúxusjeppinn frá Mercedes-EQ og Mercedes-AMG sem er hundrað prósent rafdrifinn.
Að sögn fyrirtækisins er EQE SUV-lúxusjeppinn hlaðinn þægindabúnaði og með mikla afkastagetu. Hann er byggður á sameiginlegum EVA 2.0 undirvagni sem einnig má finna í EQS og EQE fólksbílunum.
Bíllinn er með allt að 590 kílómetra drægi og rafmótorinn skilar bílnum allt að 687 hestöflum í AMG útfærslunni. Bíllinn er að auki með öflugt fjórhjóladrif og innanrýmið inniheldur þægindabúnað, MBUX hágæða marmiðlunarkerfi og Burmester 3D hljóðkerfi. Farangursrými bílsins er alls 1686 rúmlítrar.
EQE SUV-jeppinn er skref í rafbílavæðingu Mercedes en bílaframleiðandinn hefur gefið út að árið 2030 muni allur bílafloti vörumerkisins vera framleiddur kolefnishlutlaus og samanstanda einungis af rafmagnsbílum.
Forsala á EQE SUV-jeppanum mun hefjast snemma á nýju ári og er áætlaður til landsins um mitt ár 2023.
