Barnastjarnan fyrrverandi og leikkonan Hilary Duff eignaðist sitt annað barn á dögunum. Eins og svo margir ákvað hún að borða fylgjuna og til þess að gera hana lystugri setti hún hana í blandarann.
Samkvæmt E! greindi Duff frá þessu í hlaðvarpsþætti á dögunum. Í þættinum útskýrði hún að hún hefði sett ber og ávaxtasafa í blandarann til þess að gera fylgjuþeytinginn girnilegri.
„Þetta var ánægjulegasti þeytingurinn sem ég hef nokkurn tímann fengið,“ sagði Duff. „Ég hef ekki fengið jafnánægjulegan þeyting síðan ég var tíu ára.“
Á meðan það er vinsælt að láta búa til töflur úr fylgjunni sem er sögð full af næringarefnum lét Duff það vera. Hafði hún heyrt eitthvað skrítið um fylgjur í töfluformi. Hún geymir fylgjuna í klakaformi í frystinum svo auðvelt er að nota hana í þeytinga og á hún nóg eftir.