Gæti ég verið að gera hlutina öðruvísi?

Það eru ófá skiptin þar sem börn vekja upp viðbrögð hjá foreldrum sínum, sem hinir fullorðnu seinna sjá eftir. Þessi augnablik geta verið gjöf fyrir foreldra ef rétt er farið með þau. Þegar foreldrar gefa sér svigrúm til að bregðst við getur ýmislegt óvænt og áhugavert komið upp. 

Textinn er í anda hugmynda L.R. Knost sem ritstýrir Holistic Parenting Magazine.

Að tengja í staðinn fyrir að bregðast við

Þegar börnin okkar koma af stað viðbrögðum innra með okkur þá er gott að staldra við og spyrja sig, hvað er ég að upplifa hér? Hvað er barnið að reyna að segja? Í þessum aðstæðum er gott að halda áfram að spyrja barnið nánar út í hvernig því líður. Hvað kom þessari atburðarás af stað? Hvað vill barnið fá frá mér sem foreldri? Það er ekki alltaf nauðsynlegt að bregðast strax við. 

Að opna á frekara samtal

Börn eru dugleg að treysta foreldrum sínum fyrir sér. Stundum er eitthvað gert innan fjölskyldunnar sem fer yfir mörk barnsins. Stundum gerist eitthvað í skólanum sem veldur hugarangri. Bara það að hafa rödd á heimilinu, að fá tækifæri til að segja sinn sannleika getur haft mjög heilandi áhrif á börn. Ef barn fær að tala út um hlutina getur það öðlast dýpri frið og skilning. Eins getur það gefið foreldrum tækifæri til að endurskoða hvernig þeir gera hlutina eða gefið foreldrum tækifæri á að leiðrétta barnið í trausti og hlýju.

Að velja að vera fullorðinn

Þegar börnin okkar koma okkur í viðbrögð geta þau verið að vekja innra með okkur djúp æskusár. Foreldrar bregðast stundum við í þannig aðstæðum eins og börn sjálf, í stað þess að bregðast við af þroska. 

Að segja: Ég heyri hvað þú segir, takk fyrir að treysta mér fyrir þessu, getur verið mikið meðal fyrir barnið, sem hefur kannski verið að mana sig upp í að segja eitthvað sem er að fara yfir tilfinningaleg mörk þess. 

Börn eru viðkvæm í eðli sínu og þekkja ekki heiminn eins og við þekkjum hann. Það er hluti af því að vera foreldri að geta sett hluti í samhengi, geta séð hvað liggur á bak við. Stundum er það þreytt lítil manneskja sem er raunverulega að biðja um svigrúm til að fá að endurhlaða orku sína. 

• Blogga um frétt