Tracee Schaeffer á tíu börn á aldrinum 18 mánaða til 12 ára. Hún lýsir lífi sínu sem algjörri óreiðu eða „kaos“.
„Þetta er endalaus vinna en ég myndi ekki vilja hafa þetta öðruvísi. Ég átti aldrei von á því að eignast stóra fjölskyldu hvað þá tíu börn,“ segir Schaeffer en þegar hún kynntist seinni manni sínum átti hún sex börn og hann tvö. Þau eignuðust svo tvö börn saman. Það vildi svo skemmtilega til að bæði áttu þau dætur að nafni Scarlett úr fyrri samböndum.
„Þegar við sameinuðum fjölskyldur okkar þá vorum við uggandi. En börnin áttu mjög vel saman og við erum nú ein stór fjölskylda. Þegar við eignuðumst svo tvö börn til viðbótar varð fjölskyldan fullkomin.“
Dagur Schaeffer er mjög annasamur. Hún vaknar klukkan fimm flesta morgna til þess að sinna húsverkum áður en börnin fara á fætur. Hún vekur börnin klukkan sex og gefur þeim morgunmat og hefur þau svo til fyrir skólann. Hún keyrir þau í skólann og á meðan þau eru í skólanum sinnir hún húsverkum og yngstu börnunum. Deginum lýkur svo ekki fyrr en klukkan níu þegar allir eru sofnaðir.
Hún segir afar mikilvægt að vera vel skipulögð og hún er alltaf búin að ákveða allar máltíðir vikunnar áður en hún fer í búðina. Þá fer einnig mikill tími í þvottinn. „Ég skipti þvottinum í flokka. Ég þvæ stelpufötin, strákafötin, föt tvíburanna, ungbarnanna og loks okkar eigin föt. Hver hópur fær svo að ganga frá eigin fötum. Um helgar má ekki víkja frá rútínunni. „Við vöknum snemma, fáum okkur morgunmat og börnin þurfa svo að taka til í herbergjunum sínum. Ef þau eru fljót þá fá þau að gera eitthvað skemmtilegt síðar.
Schaeffer segir að öll börnin séu ólík og þau hallist að blíðu uppeldi (e. gentle parenting). „Ég hélt að það væri mikið að vera með sex börn en eftir að þeim fjölgaði þá sá ég að maður yrði að aðlagast,“ segir Schaeffer sem leggur áherslu á að kenna börnunum samkennd, virðingu og mörk.