Meðgangan fer ekki blíðum höndum um Kelly Osbourne. Bjúgur virðist hrjá hana og hún þurfti til dæmis frá að hverfa úr sundlaugapartíi til þess að setja á sig þrýstingssokka.
„Ekkert fær mann til þess að líða meira ólétt en að þurfa að yfirgefa sundlaugapartí til þess að setja á sig þrýstingssokka því allt í einu eru ökklarnir á stærð við trjádrumb,“ segir Osbourne í færslu sinni á Instagram Stories og birtir mynd af sér með fætur upp í loft í sokkunum góðu.
Osbourne tilkynnti um óléttuna í maí síðastliðnum þannig að það er eflaust farið að stytta í komu erfingjans. Barnsfaðir hennar er Sid Wilson meðlimur rokkhljómsveitarinnar Slipknot.
Þetta er fyrsta barn parsins en Osbourne er 37 ára en Wilson 45 ára. Parið hefur þekkst lengi en nýlega orðið ástfangin. Osbourne kallar Wilson sinn besta vin og sálufélaga.
Osbourne hefur áður tjáð sig um að langa í börn en barátta hennar við fíknisjúkdóm setti strik í reikninginn og rændi hana dýrmætum tíma til að lifa lífinu.