Horfðu út um gluggann hjá öðrum

Þó við Íslendingar höfum aldrei lent í útgöngubanni í heimsfaraldrinum þá eru enn þá margir í heiminum sem mega ekki fara út eða vilja ekki fara út vegna kórónuveirunnar. Vefurinn Window-Swap.com gerir fólki kleift að horfa út um gluggann hjá einhverjum öðrum, annarsstaðar í heiminum. 

Þau sem búið hafa við útgöngubann síðan í mars eru eflaust orðin mjög þreytt á útsýninu sínu út um gluggann og því ferskur andblær að fá að kíkja út um gluggann hjá einhverjum öðrum til tilbreytingar. 

Á Window-Swap er hægt að kíkja út um gluggann hjá fólki hvaðanæva að úr heiminum, allt frá sólsetri í Sao Paulo eða rigningardegi í New York. 

Höfundar vefsins, hjónin Sonali Ranjit og Vaishnav Blasubramaniam, eru búsett í Singapúr og kalla hann sóttkvíar verkefnið sitt. 

„Af því að sannleikurinn er sá að það er frekar langt í að við getum ferðast aftur og vaknað við nýtt útsýni. Þannig að þangað til getum við ferðast um heiminn í netheimum og horft út um gluggann hjá einhverjum öðrum,“ sagði Ranjit. 

Allir geta lagt sitt af mörkum og tekið upp tíu mínútna myndband út um gluggann sinn.

• Blogga um frétt