Nýtt hlýlegt hótel við miðju Gullna hringsins

„Í ferðaþjónustu er lykilatriði að þykja vænt um fólk. Mikilvægt er að skapa jákvætt andrúmsloft meðal starfsfólks, sem skilar sér alltaf til gesta,“ segir Jóhann Guðni Reynisson á Blue Hotel Fagralundi í Reykholti í Biskupstungum. Hótelið var opnað 15. júlí sl., aðeins 80 dögum frá því byrjað var að reisa og setja saman einingar svo úr varð 1.500 fermetra bygging. Alls eru 40 herbergi á hótelinu, sem er í skógarlundi við Biskupstungnabraut og í miðju Gullna hringsins.

Gaman að spjalla við gesti

„Ég veit fátt skemmtilegra en að spjalla við gestina sem eru í fríi og hafa fært sig niður um gír í hraðferð tilverunnar,“ segir Jóhann Guðni. „Íslendingar eru áberandi í hópi gesta hér og margir dvelja í nokkra daga. Margir nýta sér að í 30 kílómetra radíus héðan frá Reykholti eru margir golfvellir; í Öndverðarnesi og Kiðjabergi í Grímsnesi, í Úthlíð, í Miðdal við Laugarvatn, á Geysi og á Flúðum.“

Eigendur hótelsins nýja eru þrenn hjón; Jóhann Guðni og Elínborg Birna Benediktsdóttir, Katrín Helgadóttir og Bjarni Kristján Þorvarðarson og í Bandaríkjunum eru Claudia og Ken Peterson maður hennar, sá er stóð að byggingu álversins á Grundartanga.

Samstilltur hópur

„Við Elínborg stöndum vaktina hér núna til að byrja með og höfum starfað við ferðaþjónustu í nokkur ár ásamt Bjarna og Katrínu; byggðum og leigjum út tólf sumarhús einmitt hér í Biskupstungum. Við vildum róa áfram á sömu mið og fundum fína lóð í Reykholti sem var föl.

Gistiheimili sem þar var fyrir er í dag nýtt sem gestamóttaka og morgunverðarsalur nýja hótelsins, en framkvæmdir við byggingu þess hófust síðasta haust. Þá voru sökklarnir steyptir og snemma í vor var byrjað að raða saman einingunum, sem fengnar eru frá Noregi,“ segir Jóhann Guðni og bætir við: „Í stórri framkvæmd, eins og byggingu Blue Hótels Fagralundar, þurfti allt að ganga greitt fyrir sig.Þá er mikilvægast að hafa með sér gott fólk í samstilltum hópi – og svo borð fyrir báru svo hægt sé að bregðast skjótt við því sem er ófyrirséð.Fyrstu gestirnir hér bókstaflega mættu iðnaðarmönnum í dyrunum svo kapallinn gekk upp. Fjölskyldur og vinir unnu hér um helgar við að gera herbergin klár og skapa notalegan blæ en á öllum þeirra eru málverk sem Katrín Helgadóttir, einn eigenda hótelsins, málaði. Allt þetta gefur hótelinu hlýlegt yfirbragð sem skiptir miklu svo gestum líði vel – en til þess er leikurinn gerður.“