Ferðalög | Ferðalög erlendis | mbl | 14.2.2024 | 10:22 | Uppfært 15.2.2024 11:10

Íslensk græðgi tók yfir á hlaðborði á Spáni

Saltkjöt og baunasúpa ásamt meðlæti. mbl.is/Árni Sæberg

Íslenska græðgin tók yfir á hlaðborði sem haldið var fyrir Íslendinga og aðra áhugasama á Costa Blanca á Spáni í gærdag. Tilefnið var sprengidagurinn, hinn árlegi íslenski átdagur, þar sem Íslendingar gæða sér á saltkjöti og baunum.

Karl Kristján Hafsteinn Guðmundsson, betur þekktur sem Kalli á Spáni, birti færslu á Facebook, þar sem hann lýsti upplifun sinni af hlaðborðinu, sem reyndist allt önnur en ánægjuleg. Að sögn Karls þá mokaði fólk saltkjöti á diskinn, í vasann og ferðatöskur á meðan aðrir fengu varla bita og lentu viðburðahaldarar meðal annars í því að endurgreiða gestum sem vildu aðeins njóta þessa klassíska matar.

„Uppselt var á Saltkjöt og baunir Amöndu og Gumma sem haldið var á veitingastaðnum La Fiorentina á sprengidag. Kom í ljós að margur Íslendingurinn kann ekki að umgangast hlaðborð heldur fer fram með græðgi. Amanda og Gummi endurgreiddu því mörgum og ljóst að kvöldið er í stórtapi, því miður!

Ástæðurnar eru nokkrar. Um 20 manns, fjórði hluti gestanna, fengu ekkert saltkjöt þökk sé græðgi annarra gesta! Helstu skýringarnar eru:

Fólkið sem kom fyrst að hlaðborðinu mokaði margt rúmu kílói af kjöti á sinn disk. Það var gert ráð fyrir 450 grömmum á mann, tvöfalt meiru kjöti en þegar skammtað er á diska!
Fólk fór aftur og aftur og fékk sér ábót áður en aðrir komust sína fyrstu ferð að hlaðborðinu! Fjórðungur varð því út undan.
Margir fóru snemma af staðnum með sjálftekið kjöt í álpappír, pinklum og töskum. Það var tekið eftir ykkur.
Kom berlega í ljós að fólk kann sig ekki. Græðgin og tillitsleysið var algjört. Þetta sama fólk fór snemma af staðnum enda þurfti það að komast heim til að leggja sig eftir ofátið!
Það eina sem er eftir hjá þeim siðlausustu er að þykjast ekkert hafa fengið og heimta endurgreiðslu!

Ég geri ekki ráð fyrir að fólk biðji Amöndu og Gumma afsökunar á framferði sínu heldur þegi þunnu hljóði og þakki þeim ekki einu sinni fyrir sig.

Á þessum sprengidegi skammaðist ég mín fyrir að vera Íslendingur! Eiginlega í fyrsta sinn,“ skrifaði Karl á Facebook.