Að búa til athvarf fyrir börnin okkar á öllum aldri svo þeim líði vel inni í herberginu sínu er góð fjárfesting. Að heimilið umvefji það ást og hlýju er markmiðið. Að þau tengi við kjarnann og líði sem best.
Litirnir í ár eru grár, blár og bleikur svo eitthvað sé nefnt. Það verður mikið um tjöld og kodda í ólíkum litum. Sinnepsgulur kemur sterkur inn og húsgögn í viðarlit. Með þessu er blandað litum sem eru mun klassískari en pastellitirnir frá því í fyrra. Þroskaðir litir, falleg listaverk og veggfóður verður vinsælt að þessu sinni. Enda viljum við stöðugt vera að þroska þau andlega þótt við viljum hafa yfirbragðið einfalt og þægilegt.
Litasamsetningarnar verða flóknari og litirnir dýpri. Heilmikil hugsun er á bak við útlit í þessum stíl.
Í ár verður vinsælt að upphefja náttúruna inni í herbergjum barnanna okkar. Enda örvar það skilningarvit þeirra og tengir þau við ræturnar og jörðina. Veggfóður í blómamynstri með fallegum litum og djúpgrænum tónum verður að þekja í það minnsta einn vegg hjá barninu, sama á hvaða aldri það er.
Skemmtileg stefna þegar barnaherbergi eru annars vegar er að hafa þau einföld. Falleg húsgögn, litir og veggfóður gera kraftaverk; mjúkir púðar, tjöld og teppi. Síðan er kúnstin að hafa bara fáa hluti að leika sér með hverju sinni og nokkra hluti í fataskápnum. Börn kunna vel að meta þegar hlutum er skipt út og læra best að klæða sig sjálf og taka til í herberginu ef það er ekki of troðið þar inni. Í einföldum herbergjum er meira pláss til að leika sér.
Friður og ró er einnig áberandi stefna. Við búum til slíka stemningu með litum í herberginu, lýsingu og fallegum hlutum uppi á veggjum. Gott er að nota stjörnur eða aðra hluti sem lýsa í myrkri. Þannig geta börnin legið í rúminu og horft á eitthvað fallegt þegar þau eru að sofna eða verið er að lesa fyrir þau á kvöldin.