Leikkonan Ashley Benson eignaðist sitt fyrsta barn á dögunum með eiginmanni sínum Brandon Davis. Benson tilkynnti um fæðingu barnsins á Instagram-síðu sinni á fimmtudag, en hún birti mynd af fingrum nýburans og bleiku hjarta. Samkvæmt heimildarmanni Us Weekly þá eignuðust hjónin stúlkubarn.
Er þetta fyrsta barn hinnar 34 ára gömlu leikkonu sem er þekktust fyrir hlutverk sitt í unglingaþáttaröðinni Pretty Little Liars. Benson giftist olíuerfingjanum Davis í laumi undir lok árs 2023.
Leikkonan var í sambandi með rapparanum G-Eazy á árunum 2020 til 2022, en þar áður var hún með ofurfyrirsætunni Cara Delevingne í tvö ár.
Davis, 43 ára, er barnabarn olíujöfursins Marvin Davis og hefur átt í ástarsamböndum við leikkonurnar Mischa Barton og Drew Barrymore.