Grétar Rafn lék með Alkmaar

Grétar Rafn Steinsson lék allan tímann fyrir AZ Alkmaar sem gerði 2:2 jafntefli við Ajax í hollensku 1. deildinni. Leikurinn fór fram á Amsterdam Arena að viðstöddum 51,000 manns. Jóhannes Karl Guðjónsson var í leikmannahópi Alkmaar en hann sat á bekknum allan tímann.

Arnar Þór Viðarsson sat á bekknum allan tímann hjá Twente sem lagði Willem á útivelli. Arnar Þór hefur fá tækifæri fengið með liðinu á yfirstandandi tímabili.

Ólafur Örn Bjarnason skoraði síðara mark Brann úr vítaspyrnu þegar liðið gerði 2:2 jafntefli við Helsingborg í Skandinavíudeildinni í knattspyrnu. Henrik Larsson, sem gengur til liðs við Manchester United í janúar, jafnaði metin fyrir Helsingborg 20 mínútum fyrir leikslok. Kristján Örn Sigurðsson lék ekki með Brann vegna meiðsla og Ármann Smári Björnsson var ekki í leikmannahópnum.

Árni Gautur Arason lék ekki með Vålerenga vegna meiðsla en lið hans lagði sænsku meistarana í Elfsborg, 3:2, og Viborg tapaði fyrir AIK, 1:2. Vålerenga hlaut 14 stig í riðli tvö. Elfsborg varð í öðru sæti með 8 stig, AIK 6 og Viborg 3.

Hannes Þ. Sigurðsson lék allan tímann í framlínu Bröndby sem gerði 1:1 jafntefli við Lilleström. Hannes lagði upp mark Bröndby sem David Williams skoraði en Frode Kippe jafnaði metin fyrir Lilleström þremur mínútum fyrir leikslok.Viktor Bjarki Arnarsson lék síðustu sjö mínúturnar fyrir Lilleström.

Gunnar Þór Gunnarsson sat á bekknum hjá Hammarby sem tapaði fyrir Köbenhavn, 1:2, Pétur Marteinsson var hins vegar ekki í hópnum.

EGIDIJUS Petkevicius, markvörður HK, fékk fyrir leikinn gegn Fram á sunnudaginn gjöf frá fyrri félögum sínum í Fram. Það var mynd af Íslandsmeisturunum og virtist hvetja Egidijus til dáða því hann varði sem berserkur.

Íslandsmeistarar FH lögðu Þrótt, 4:1, í æfingaleik um helgina. Tryggvi Guðmundsson skoraði tvö markanna og þeir Matthías Vilhjálmsson og Atli Guðnason gerðu sitt markið hvor.