Vill ekki skipta Evrópu í tvennt

Eiríkur Hauksson.
Eiríkur Hauksson. mbl.is/Eggert
Eiríkur Hauksson segist ekki hrifinn af þeirri hugmynd að skipta Evrópu í tvennt í Söngvakeppni evrópskra sjónvarpsstöðva, í samtali við norska dagblaðið Aftenposten.

Eiríkur segir menn ekki mega gerast of gagnrýna á keppnina, tónlistin sé það sem skipti öllu máli.

Hann vildi þó gjarnan leggja niður sms-kosningu í keppninni og taka upp gamla stigagjafarfyrirkomulagið, að dómnefnd í hverju landi gefi lögunum stig. Ekki mætti gera lítið úr tónlist ríkjanna sem komust áfram, mikið væri af góðri tónlist frá austanverðri Evrópu. Ísland hafnaði í 13. sæti í undankeppninni, hlaut 77 stig. 14 stigum munaði að Eiríkur kæmist í úrslit.

Aftenposten segir mikið hafa verið rætt um það í Helsinki seinustu daga að níu af þeim tíu löndum sem komust áfram í forkeppninni skyldu vera frá Austur-Evrópu.

Eiríkur sagði í samtali við Morgunblaðið eftir forkeppnina að „austurblokkin" hefði hana í hendi sér.

Bloggað um fréttina