Félagarnir Daði Freyr, sem er orðinn landskunnur eftir þátttöku í Söngvakeppni Sjónvarpsins, og Jökull Logi Arnarsson skipa hljómsveitina LESULA sem var að senda frá sér nýtt lag, „Up in tree“.
„Lagið fjallar um apa sem er dálítið útundan frá hinum öpunum sem klifra upp í tré og eru almennt í miklu stuði. Honum finnst þeir asnalegir og tilgerðarlegir, hangandi þarna uppi í tré sippandi í sig banönum, en þegar hann brúkar kjaft fær hann eingöngu jákvætt svar og boð um að vera með þeim í gleðskapnum,“ segir Jökull Logi spurður um yrkisefnið. „Þar með lærir hann að þessi þungi sem var í honum var sá að hann var hræddur við að vera hann sjálfur, þ.e. api, og fordæmdi því hina apana í blindri öfund. Hann ákveður að svara þeim með því að klifra upp til þeirra og hann skemmtir sér betur en hann hafði nokkurntímann áður gert,“ bætir Jökull við. Það má því segja að boðskapur lagsins sé sá að maður á alltaf að vera maður sjálfur, þannig líður manni best.
Þetta er þriðja lagið sem þeir félagar gefa út undir nafninu LESULA en þeir eru báðir búsettir í Berlín þar sem þeir hafa lagt stund á nám í tónsmíðum. Lagið er komið á Spotify og er hægt að hlusta á það með því að smella hér.