Leikkonan Diane Kruger byrjaði að reykja vegna þess að henni leið svo illa eftir að hafa leikið í kvikmyndinni In the Fade. Hún lifði sig svo mikið inn í myndina að hún segir að myndin hafi breytt lífi sínu til frambúðar.
Page Six greinir frá því að Kruger, sem leikur þýska móður sem missir eiginmann sinn og sex ára gamalt barn, hafi lifað sig inn í sorgina. „Ég missti þrjú kíló... Mér leið eins og ég væri að drukkna í sorg, drukkna í grámyglulegu veðri, drukkna í sögunni. Ég byrjaði að reykja,“ sagði leikkonan um þátttöku sína í myndinni.
Kruger sagðist hafa fundið til sterkrar ábyrgðar til þess að finna sannleikann og minnast fólksins sem þetta kom fyrir.