Leikkonan Jane Fonda segist ekki vera stolt af öllum þeim lýtaaðgerðum sem hún hefur farið í. Heimildarmyndin Jane Fonda in Five Acts kom nýverið út á sjónvarpsstöðinni HBO í Bandaríkjunum.Myndin fjallar um líf Fonda en hún hefur verið í sviðsljósinu í marga áratugi.
Heimildarmyndin snertir á mörgum málefnum enda hefur Fonda tekið að sér fjöldann allan af verkefnum í gegnum árin. Hún er nú í þáttunum Grace and Frankie á Netflix og hafa þættirnir slegið í gegn. Fonda verður 81 árs síðar á árinu og dylst engum að hún hefur farið í lýtaaðgerðir.
„Ég hata þá staðreynd að mér hafi fundist ég þurfa að breyta sjálfri mér líkamlega til að líða eins og ég sé í lagi. Ég vildi að ég væri ekki þannig. Ég elska eldri andlit. Ég elska andlit sem sér á. Ég elskaði andlit Vanessu Redgrave. Ég vildi að ég hefði verið hugrakkari. En ég er eins og ég er,“ segir Fonda í myndinni.