Dýrasta brúðkaup sögunnar?

Eftir margra daga veisluhöld gengu þau Isha Ambani, dóttir ríkasta manns Indlands, og Anand Piramal, sonur indversks milljarðamærings, í hjónaband í gær, miðvikudag. Ekkert var til sparað og er því slegið upp í erlendum fjölmiðlum eins og Time  að líklegt sé að brúðkaupið hafi verið það dýrasta í sögunni. 

Beyoncé söng meðal annars Crazy in Love í veislu um helgina og Hillary Clinton var meðal gesta sem og John Kerry en bæði gegndu stöðu utanríkisráðherra Bandaríkjanna í forsetatíð Baracks Obama. Auk þess var mikið um Bollywood-stjörnur og framafólk á Indlandi í veislunum. Hin nýgiftu riyanka Chopra og Nick Jonas fögnuðu einnig brúðkaupi indversku erfingjanna. 

Brúðkaupið á miðvikudaginn fór fram í 27 hæða glæsihýsi fjölskyldunnar í Mumbai á Indalndi. Hefð er fyrir því að brúðgumar á Indlandi mæti á hesti í brúðkaupi sitt en Anand Piramal mætti á Rolls Roys.  

Bloomberg greindi frá því fyrr í vikunni að brúðkaupsveisluhöldin hefðu kostað 100 milljónir Bandaríkjadala. Annar heimildarmaður tengdur Ambani-fjölskyldunni vildi þó meina að upphæðin væri nær 15 milljónum Bandaríkjadala.