Fjölskylda Michael Jackson hefur lagt fram kæru á sjónvarpsstöðina HBO í Bandaríkjunum vegna fyrirhugaðrar sýningar á heimildarmyndinni um Jackson. Heimildarmyndin sem ber nafnið Leaving Neverland var frumsýnd á Sundance-kvikmyndahátíðinni í lok síðasta mánaðar.
HBO keypti sýningarrétt á kvikmyndinni og hyggst sýna hana 3. og 4. mars næstkomandi. Í heimildarmyndinni koma fram alvarlegar ásakanir á hendur Jackson um barnaníð.
Samkvæmt fjölskyldunni skrifaði HBO undir samning árið 1992 um að sýna ekki neitt niðrandi efni um tónlistarstjörnuna. Samningurinn var undirritaður í kjölfar þess að stöðin sýndi heimildarmyndina „Michael Jackson live in concert in Bucharest: The dangerous tour.“ Fjölskyldan telur þetta því vera brot á samningi og krefst yfir 100 milljóna Bandaríkjadala í skaðabætur, eða tæplega 12 milljarða íslenskra króna.
Samkvæmt TMZ ætlar HBO að sýna myndina þrátt fyrir kæruna til þess að sem flestir geti séð myndina og ákveðið fyrir sjálfa sig skoðun sína á Jackson.