RÚV-kaffibolli í HBO-stiklu
Kaffibolli merktur Ríkisútvarpinu sést í stiklu sem bandaríska framleiðslufyrirtækið HBO hefur gefið út fyrir aðra þáttaröð dramaþáttanna Succession. Þar situr ein persóna þáttanna í stól, með RÚV-kaffibolla sér við hlið.
Þættirnir fjalla um valdamikla fjölskyldu, sem stýrir í sameiningu alþjóðlegu fjölmiðlaveldi. Ekki liggur þó fyrir hvort eða hvernig Ríkisútvarpið mun flækjast inn í söguþráð þáttanna.
Mikið hefur verið fjallað um Starbucks-kaffibolla sem sást í Game of Thrones-þættinum sem frumsýndur var á sunnudagskvöld. Sá bolli átti sér þó þær eðlilegu skýringar að þar varð einhverjum á í messunni og Starbucks-kaffimálið gleymdist einfaldlega á borðinu er atriðið var tekið upp. Bollinn hefur nú verið fjarlægður úr uppfærðri útgáfu þáttarins.
Allt þetta bollafár í Game of Thrones hefur vakið mikla athygli. En nú er komið upp annað bollamál, sem mun ef til vill ekki vekja heimsathygli, enda fáir aðrir en Íslendingar sem kveikja á því að þarna sé um kaffibolla íslenska Ríkisútvarpsins að ræða.
Stiklan, sem birt var á YouTube 1. maí síðastliðinn, auglýsir sem áður segir aðra þáttaröð af Succession. Sjá má RÚV-kaffibollanum bregða fyrir á 37. sekúndu myndskeiðsins.