Ver myndina við minnismerkið um helförina

Tónlistarkonan Pink ver myndina sem hún birti af börnum sínum tveimur, Willow og Jameson, hlaupandi á milli minnismerkjanna um helförina í Berlín. Hún hefur verið gagnrýnd á samfélagsmiðlum fyrir að sýna börn sín að leik við minnismerkin og segja sumir hana ekki sýna helförinni virðingu með því að leyfa þeim að leika sér þar.

Pink segir í nýrri færslu á Instagram að börnin hennar séu í reynd gyðingar og að hún sé það líka. Hún vitnar í arkitektinn sem hannaði minnisvarðann og segir hann hafa trúað því að börn mættu vera börn.  

Skiptar skoðanir eru um hvað má gera á svæðinu í kringum minnisvarðana í Berlín en þeir eru sem áður segir minnisvarðar um helförina. Í athugasemdakerfinu undir mynd Pink segja sumir að það gleðji þá að sjá börn að leik og fagna lífinu. Aðrir segja að það eigi að kenna börnum að sýna virðingu á stöðum sem þessum.

Margir bentu á að arkitektinn sem hannaði minnismerkin, Peter Eisenman, sagði að minnisvarðar séu hversdagslegir hlutir, ekki heilagir staðir. „Hugmynd mín var að leyfa eins mörgum af mismunandi kynslóðum, á sinn eigin hátt, að takast á við eða ekki að vera á þessum stað, og ef það vill hafa gaman þarna finnst mér það í lagi,“ sagði Eisenman í viðtali við BBC.

• Blogga um frétt