Hertogahjónin af Cambridge, Vilhjálmur og Katrín eru í opinberri heimsókn í Pakistan þessa dagana. Díana prinsessa, móðir Vilhjálms, heimsótti landið þrisvar sinnum og var meira að segja að íhuga að flytja þangað að því fram kemur í pistli Richard Kay, konunglegs blaðamanns Daily Mail.
Díana heimsótti landið þrisvar, þar af aðeins einu sinni á meðan hún var gift Karli Bretaprinsi. Kay rifjar upp að Díana hafi heimsótt landið tvisvar á meðan hún átti í ástarsambandi við hjartaskurðlækninn Hasnat Khan en hann var fæddur í Pakistan.
Er hún sögð hafa verið að íhuga að giftast hjartaskurðlækninum og jafnvel flytja til heimalands hans. Díana náði meðal annars að heimsækja fjölskyldu kærasta síns á ferðum sínum til Pakistan. Díana á að hafa heillast af lífsstíl vinkonu sinnar, Jemimu Goldsmith, sem var á sínum tíma gift núverandi forsætisráðherra Pakistan, Imran Kahn.
Í maí 1997 fór Díana prinsessa til Pakistan í þriðja og síðasta sinn. Í ferðinni er hún sögð hafa áttað sig á því að lífið í Pakistan væri of óútreiknanlegt. Díana hætti með hjartaskurðlækninum skyndilega og í lok ágúst lést hún í bílslysi í París með nýjum elskhuga, Dodi Fayed.