Liam Fray, liðsmaður hljómsveitarinnar The Courteeners telur að rapparinn Eminem hafi farið yfir strikið þegar hann vísaði til hryðjuverkaárásanna í Manchester í nýju lagi sínu.
Eminem, eða Marshall Mathers, var harðlega gagnrýndur af mörgum í lok síðustu viku fyrir textann í laginu. Borgarstjóri Manchester-borgar, Andy Burnham, sagði versið vera óþarfa særindi.
Lagið sem um ræðir er lagið Unaccommodating á plötunni Music To Be Murdered By sem kom út á föstudag. Á mánudag var platan komin á topplista í Bandaríkjunum og Bretlandi.
Línurnar sem vísa til hryðjuverkaárásanna eru:
„I’m contemplating yelling ‘bombs away’ on the game
like I’m outside of an Ariana Grande concert waiting“
Hljómsveit Fray er þó enn fyrir ofan Eminem á breska listanum Official Charts. „Það er eins og hann sé gamall grínisti sem kemst ekki í sjónvarpið lengur og segir ekkert nema eitthvað svívirðilegt,“ segir Fray í viðtali við BBC.
„Hann er að reyna að vera eins svívirðilegur og hann getur, mögulega af því að hann á engar hugmyndir eftir, það er það sem það er. Hann er bara að reyna að koma fólki á óvart,“ segir Fray.