Hjónabandið yndislegt en líka leiðinlegt

Það er ekki alltaf dans á rósum að vera giftur. Söngkonan Pink veit hversu erfitt það er að vera í hjónabandi en segir það líka yndislegt. Hún opnaði sig um hjónabandið á Instagram á mánudaginn. Pink hefur verið gift mótorkrosskappanum Carey Hart í 14 ár. 

„Ég og hann höfum verið í þessu lengi og það er óþreytandi og þrjósk hugsjón sem heldur okkur saman. Hjónaband er ferlegt, yndislegt, þægilegt og fullt af bræði. Það er leiðinlegt, hræðilegt og veldur kvíða. Það snýst um að elska aðra fallvalta manneskju á meðan þú reynir að elska sjálfa þig. Það tekur heila eilífð að snúa aftur að borðinu. Fólk hlær að okkur af því að við erum annaðhvort að rífast eða hlæja. Það ranghvolfir í sér augunum þegar við tölum um ráðgjöf,“ skrifaði Pink meðal annars. 

Pink og Carey Hart með börnum sínum Willow Sage Hart og Jameson Moon Hart árið 2019. AFP

Hún hélt síðan áfram að tala um hversu mikið ráðgjöf hefði gert fyrir hjónabandið en þetta er ekki í fyrsta skipti sem hún opnar sig um það. Hún áréttaði að ráðgjöf væri ekki bara fyrir veikt fólk, hippa eða frjálslynda. Hún sagði ráðgjöf vera fyrir alla og sagði fólk læra að hlusta í henni. 

Frétt af mbl.is

Hjónabandið hefði aldrei gengið án ráðgjafa

• Blogga um frétt