Leikarinn Matthew McConaughey hló bara þegar hann fékk spurningu út í kynferðislega spennu á milli Jennifer Aniston og Brads Pitts. Fyrir nokkrum vikum tóku stjörnurnar þátt í leiklestri á kvikmyndinni Fast Times at Ridgemont High frá árinu 1982 til styrktar góðgerðarmálum sem vakti mikla athygli.
Leiklesturinn fór fram á netinu en í spjallþætti Andys Cohens á dögunum spurði spenntur áhorfandi út í spennuna á milli fyrrverandi hjónanna. „Fann ég hitann í gegnum skjáinn frá Brad? Svo áþreifanlegur. Já, hann var áþreifanlegur,“ sagði leikarinn og hló.
Honum fannst spurningin fyndin og sú staðreynd að daginn eftir snerist allt um samband þeirra. „Nei ég fann reyndar ekki fyrir neinu í gegnum skjáinn en það var gott umræðuefni daginn eftir.“