Enska leikkonan Carey Mulligan hefur að langmestu leyti fengið lofsamlega dóma um frammistöðu sína í dramatryllinum Promising Young Woman og er tilnefnd til Óskarsverðlauna.
Þó hefur komið fram að ein umsögn fór fyrir brjóstið á henni, í tímaritinu Variety seint á síðasta ári. Leikur hennar þótti að vísu ljómandi góður en gagnrýnandinn, Dennis Harvey, sem starfar sjálfstætt, lét að því liggja að hún væri ekki nógu „heit“ fyrir hlutverkið og gaf í skyn að ástralska leikkonan Margot Robbie, sem einmitt er einn framleiðandi myndarinnar, hefði frekar átt að fara með það.
Mulligan svaraði þessu fullum hálsi í viðtali við The New York Times, kvaðst hafa tekið þessi ummæli nærri sér og að gagnrýni ætti að vera á faglegum nótum og snúast um listina en ekki hvort gagnrýnandinn vildi sjá hina eða þessa leikkonuna í tilteknu hlutverki. Variety tók undir þetta sjónarmið og bað Mulligan formlega afsökunar á þessum hluta umsagnarinnar.
Nánar er fjallað um Promising Young Woman í Sunnudagsblaði Morgunblaðsins.