Kvikmyndin Dýrið í leikstjórn Valdimars Jóhannssonar hefur verið valin til þátttöku í Cannes-kvikmyndahátíðinni í ár.
Þar keppir hún í flokknum Un Certain Regard en enskt heiti myndarinnar er Lamb. Kvikmyndahátíðin verður haldin í 74. sinn í júlí.
Myndin fjallar um sauðfjárbændurna Maríu (Noomi Rapace) og Ingvar (Hilmir Snær Guðnason) sem búa í fögrum en afskekktum dal. Þegar dularfull vera fæðist á bóndabænum ákveða þau að halda henni og ala upp sem sitt eigið afkvæmi. Vonin um nýja fjölskyldu færir þeim mikla hamingju um stund, hamingju sem verður þeim síðar að tortímingu.