Albert fursti af Mónakó neitar sögusögnum um að hjónaband hans og Charlene prinsessu standi á brauðfótum.
„Hún fór ekki frá Mónakó í fússi,“ segir Albert í viðtali við People. „Hún var mér ekki reið. Hún var að fara til Suður Afríku til þess að meta góðgerðasamtökin sem hún stofnaði þar í landi auk þess að verja tíma með bróður sínum og vinum. Þetta átti aðeins að vera vikulöng ferð en hún veiktist.“
Charlene hefur þurft að glíma við þrálátar sýkingar í ennis-og kinnholum og þurft að ganga undir margvíslegar aðgerðir. Henni hefur verið ráðlagt frá því að ferðast þar til í október hið fyrsta.
Albert leggur áherslu á að þetta sé alfarið heilsufarslegt vandamál sem takast þurfti á við og hann sér eftir að hafa ekki tjáð sig um orðróminn fyrr.
„Ég var að einbeita mér að uppeldi barna minna og ég hélt að þetta myndi líða hjá. Ef maður reynir að svara öllu sem birtist þá er maður stanslaust að. Það er tímasóun.“
Albert segir þetta hafi tekið sinn toll á Charlene. „Auðvitað hefur þetta áhrif á hana og mig einnig. Við erum auðvelt skotmark því við erum opinbert fólk.“