Söngkonan Adele var gráti næst þegar hún tilkynnti á Instagram að hún hafi frestað tónleikaröð sinni í Las Vegas, degi áður en fyrstu tónleikarnir áttu að hefjast.
Grammy-verðlaunahafinn sagði uppselda tónleikaröðina ekki vera tilbúna og kenndi „töfum á sendingum og Covid“ um.
„Mér þykir fyrir því en tónleikarnir eru ekki tilbúnir,“ sagði hún með tár í augum.
„Við reyndum allt sem við gátum til að klára þetta í tæka tíð svo að þetta yrði nógu gott fyrir ykkur en tafir á sendingum og Covid hafa algjörlega gert út af við okkur,“ bætti hún við og sagði helming starfsliðsins hafa smitast af Covid-19.