Bandaríska leikkonan Jennifer Coolidge bjóst sannarlega ekki við því að sigurræða hennar á Golden Globes-verðlaunahátíðinni yrði jafn tilfinningaþrungin og hún var þegar hún tók á móti sínum fyrstu Golden Globes-verðlaunum síðastliðið þriðjudagskvöld.
Leikkonan segist hafa verið hissa á sigurræðu sinni. „Ég stóð fyrir framan mannfjöldann og gleymdi því hvar ég var. Ég opnaði mig mikið um tilfinningar mínar. Ég var ekki að reyna að vera fyndin – mér var alvara,“ sagði hún í samtali við Page Six.
Coolidge skaust hátt upp á stjörnuhimininn eftir hlutverk sitt sem Tanya McQuid í þáttunum White Lotus, en hún hefur farið með hlutverkið í tveimur þáttaröðum sem komnar eru út á streymisveitu HBO.
Í ræðu sinni sagði Coolidge drauma hennar um frægð og frama hafa fjarað út á sínum tíma, en það sem hafi haldið henni gangandi í gegnum árin hafi verið lítil hlutverk frá vinum sínum, til dæmis í The Witcher, Sex and the City, American Pie og Legally Blonde.
Coolidge útskýrði í ræðu sinni að hún hafi ekki haft jafn mikið álit á sjálfri sér og aðrir í kringum hana hafi á henni. Spurð hvers vegna sagðist hún hreinlega ekki vita það. „Ég meina, í ástarlífinu hef ég aldrei fundið neinn sem er réttur fyrir mig. Ég hef ekki fundið ástina í lífi mínu,“ svaraði leikkonan.
Jennifer Coolidge delivers an epic #GoldenGlobes acceptance speech that makes #TheWhiteLotus creator Mike White cry. https://t.co/m069JEKekW pic.twitter.com/WBWx9H6BCj
— Variety (@Variety) January 11, 2023