Katrín hertogaynja af Cambridge klæddist bláum kjól með hvítum doppum þegar hún lét sjá sig á Wimbledon-mótinu sem haldið er í Bretlandi um þessar mundir. Hertogaynjan hefur ætíð verið hrifin af doppóttum kjólum og er þetta ekki fyrsti doppótti kjóllinn sem hún klæðist í sumar.

Blái kjóllinn sem hertogaynjan klæddist í vikunni er frá Alessöndru Rich. Hann er með fallegu og látlausu belti í miðjunni sem gerir þó mikið fyrir kjólinn.

Kjóllinn er frá Alessöndru Rich. AFP

Þetta var fyrsti leikurinn á móti ársins sem Katrín mætir á, en hún er ötull aðdáandi tennis og fór á leiki á mótinu með fjölskyldu sinni löngu áður en hún kynntist Vilhjálmi Bretaprins og giftist inn í bresku konungsfjölskylduna. Að þessu sinni var eiginmaður hennar með henni í för.

Í anda Díönu prinsessu

Katrín klæddist einnig doppóttum kjól frá Alessöndru Rich á Ascot-veðreiðunum. Sá kjóll er hvítur með brúnum doppum og þótti Katrín bera af á Ascot í ár, líkt og svo oft áður.

Frétt af mbl.is

Þær best klæddu á Ascot

Díana heitin prinsessa, tengdamóðir Katrínar, var einnig hrifin af doppóttum kjólum og er einn af frægari kjólum hennar hvítur kjóll með svörtum doppum. Klæddist hún honum á íþróttaviðburði árið 1986.

Kjóllinn sem Katrín klæddist á Ascot veðreiðunum er frá sama merki og kjóllinn sem hún var í á Wimbledon-mótinu. AFP

Kjóllinn þykir í anda Díönu prinsessu. AFP