Matvælaráðuneytið og Intellecta undirrituðu nýverið samning um markvissari og skilvirkari öflun og úrvinnslu gagna í sjávarútvegi, að því er fram kemur í tilkynningu á vef Stjórnarráðsins.

Samningurinn var kynntu á fjórða fundi samráðsnefndar um sjávarútvegsstefnu sem haldinn var 16. nóvember, en nefndinni er gert að hafa yfirsýn yfir starfshópa í umfangsmikilli stefnumótun á sviði fiskveiðistjórnunar undir merkjum „Auðlindin okkar“.

Frétt af mbl.is

Ný sjávarútvegsstefna fyrir opnum dyrum

„Í kringum sjávarútveg og tengdar greinar verður til mikið magn af gögnum sem skila sér ekki alltaf á sömu staði og nýtast því ekki sem skyldi. Um er að ræða gögn frá rekstraraðilum, stjórnsýslunni og rannsóknargögn sem má nýta betur en nú er gert. Með aukinni þróun í gervigreind við gagnaúrvinnslu hafa orðið til nýir möguleikar til gagnaöflunar og upplýsingagjafar sem draga úr kostnaði og tryggja meiri áreiðanleika. Niðurstöður verkefnisins munu nýtast í vinnu starfshópa Auðlindarinnar okkar, Aðgengi, Samfélag, Tækifæri og Umgengni,“ segir í tilkynningunni.

Þá segir að næsti fundur samráðsnefndar fari fram 17. janúar og verði þá kynntar bráðabirgðaniðurstöður starfshópanna fjögurra.