Þetta sýna tölur sem Embætti landlæknis birti í gær, 28. febrúar, þegar þrjú ár voru liðin síðan fyrsta Covid-smitið greindist hér á landi.

Enn greinast á bilinu 100 til 120 manns með veiruna vikulega. Flest opinber Covid-19-próf eru tekin á sjúkrahúsum landsins, en heilsugæslan hefur tilkynnt að frá og með 1. mars muni hún ekki lengur bjóða upp á einkennasýnatöku. Einungis verður boðið upp á sýnatöku fyrir ferðalanga sem þurfa að sýna fram á neikvætt Covid-19-próf við komu til annarra landa.

Frá upphafi faraldursins hér á landi hafa samtals 263 látist vegna Covid-19. Athygli vekur að af þeim 263 sem látist hafa létust 224 á árunum 2022 og 2023, en öllum sóttvarnatakmörkunum var aflétt í lok febrúar á síðasta ári.

Sjö milljónir á heimsvísu

Samkvæmt tölum frá Alþjóðaheilbrigðismálastofnuninni (WHO) hafa tæplega sjö milljónir manna látist vegna Covid-19 á heimsvísu, frá upphafi faraldursins snemma árs 2020, og enn greinast tugir þúsunda manna með veiruna á sólarhring.