Finnbjörn A. Hermannsson, forseti ASÍ, Alþýðusambands Íslands, segir að fjárlagafrumvarpið sem kynnt var í gær sé ósköp svipað og búið var að boða.

Í samtali við mbl.is segir hann stuttu útgáfuna þá að það sé eiginlega ekkert að frétta í frumvarpinu.

Frétt af mbl.is

Fjárlagafrumvarp ráðherra endurtekið efni

Skilar sér ekki til heimilanna

„Það sem við horfum helst á eru þær álögur sem verið er að leggja á almenning. Við hefðum mjög gjarnan viljað sjá tekjuhliðina öðruvísi, að atvinnulífið hefði fengið að taka sinn skerf einnig.“

Segir hann að ASÍ komi til með að kynna útfærðari tillögur en þær séu ekki tilbúnar í augnablikinu.

Finnbjörn segir að einstaka liðir í frumvarpinu séu allt í lagi en mikið til séu álögurnar að koma á almenning og tekur Finnbjörn undir orð þeirra sem segja að fjárlögin muni ekki skila sér til heimilanna eins og frumvarpið sé sett fram.