Það er ekki á hverjum degi sem boðið er í 110 ára afmæli. Það gerðist þó í gær þegar Morgunblaðið, elsti fjölmiðill landsins, náði þeim áfanga. Í tilefni af 110 ára afmælinu var boðið til glæsilegs morgunverðar í hádegisverðarsal Árvakurs, útgáfufélagi Morgunblaðsins í Hádegismóum. 

Starfsfólk og stjórnarfólk kom saman til að halda upp á þennan áfanga og var veglegur morgunverður í boði. Davíð Oddsson ritstjóri hóf veisluna með ávarpi, áður en Stefán Einar Stefánsson þáttastjórnandi Dagmála ræddi við Harald Johannessen, ritstjóra og framkvæmdastjóra, og Magnús E. Kristjánsson, framkvæmdastjóra sölu-og markaðssviðs Árvakurs. 

Regína Ósk Óskarsdóttir og Ásgeir Páll Ásgeirsson, söngvarar og útvarpsstjörnur á K100, fengu salinn til að syngja fyrir afmælisbarnið.

Eins og sjá má á meðfylgjandi myndum leiddist ekki nokkrum lifandi manni!